الأحد، 30 مايو، 2010

الشمس شمس .. والقمر قمر


.
النظرية العلمية بتقول ان القمر جسم معتم ولكنه يعكس الضوء الساقط عليه، وإن الشمس هي مصدر الضوء أو جسم بيصدر الضوء .. المهم يعني .. إن المتعارف عليه ان الشمس بتنور لنا الدنيا الصبح والقمر بينور لنا الليل .. علمونا زمان كدا واحنا صغيرين.. بس برضه علمونا اننا منقدرش نستغنى عن واحد فيهم.
بالرغم ان الاتنين وظيفتهم الجوهريه والمعروفه واحدة ، هي الحصول على الضوء ،الا ان كل واحد فيهم له احساس مختلف عن التاني وله طبيعة مختلفة تماماً ..
الشمس تصدر، والقمر يعكس ، دا غير ان الشمس مؤنثه والقمر مذكر .. وغير..وغير ..وغير
أسيب لكم الفروق بين الشمس والقمر و أنتقل أنا لنقطة اكثر اهمية .. بما ان الشمس هي المصدر الاساسي للحصول على الضوء فى عالمنا فدا معناه ان القمر بيعوض وجودها فى فترة غيابها بالليل ، ولكن لانه مش مصدر اساسى للضوء لانه جسم معتم فهو مش شمس .. القمر مش شمس.
أوصل لنقطة تانية أهم وأهم .. غياب شخص معين في حياتن ، وحلول اخر بيأدي نفس الوظيفة وبنفس الشكل وبإخلاص ويمكن بشكل أفضل مبيعوضش غياب الأولانى .. التاني ممكن ينور شوية (لأنه معتم زي القمر كدا) بس مش هيكون مصدر الضوء(لانه مش شمس)
ماانا قلت يا نــــــــــاس الشمس شمـــس.. والقمر قمـــــــــــر

حول دنيتنا الغريبة*


سعات نفس الشئ ممكن يكون السبب في حاجة و نقيضها ، حياة وموت فى نفس الوقت .. المية .. نقطة واحدة ممكن تكون سبب حياة بنى ادم وسيول أو طوفان بيموت البشر .. كذلك الهواء.. النفس بيساوي عمر.. والأعاصير بتدمر وتهدم كل حاجة.
وهكذا.. أنا دا وصلني لحاجة .. ان سعات أشخاص بتكون سبب سعادة وسبب تعاسة برضه.. وأشخاص تانية تكون رابط او سبب ربط بينك وبين حد تانى بتحبه.. ويوم ماتفترقوا تكون الأشخاص إلى جمعتهم همَ همَ سبب فراقكم .. غريبة ولله دنيتنا دى ..حكمتك يارب.
*عن واقع أحياه

الوردة البيضاء وقرص الشمس والشيكولاتة

ممكن قصاد وردة بيضاء مقدرش "أصلب طولي " ، معرفش اية سر الورد الأبيض بالنسبالي أو إيه سر تأثيرة عليا بالشكل ده .. اغلب الظن ان الورد بشكل عام هو منتهى التقدير والحب والدفئ .. واللون الابيض لون راقى وناعم وحنين .. وواضح طبعاً، ومنور زى قرص الشمس .
الشمس ...اه الشمس .. جميلة الشمس .. بحبها أوى وبفرح بيها أوى أوى ..دافية برضه .. زى الوردة البيضاء كدا ، مبحبش أفتكر الشمس بالحر والزهق والملل والضغط العالي ..لا لا لا الشمس .. دفئ ..حنان.. سعات كمان لعب ومرح ..تخيلوا معايا كدا ..جنينة فيها أطفال بيلعبوا (أولى), وبنات شعرها بيطير, وولاد راكبة عجل.. ومفرش ع الارض , كاروهات احمر فى ابيض عليه ابريق لبنى وجنبه بسكوت .. وهناك على دكة خشب واحد وواحدة بيحبوا بعض ، مبيتكلموش .. انما عيونهم خارج منها اشعة من حرارتها مش حاسين بقوة دفئ الشمس.. وراجل عجوز بيسند مراته ..عجوزة برضه ,شيخوختهم ممنعتهمش من انهم يحبوا بعض ,او من انهم يخرجوا بره البيت.. المشهد دا كله تفتكروا ممكن يتم من غير وجود الشمس ؟!
بمناسبة الدفئ.. عارفين اية كمان دافئ؟! الشيكولاتة .. اه الشيكولاتة دافية فى لونها , وطعمها , فى شكلها, لما تمسك حتة شيكولاتة وتقضم منها قضمة , وتسيبها تذوب كدا,احساس دافي بجد ,على فكرة انا استقبالى للشيكولاتة فى حد ذاتة رومانسى جداً ودة يمكن لانى بربط دايما الشئ الدافئ بالشئ الرومانسى .. وردة بيضاء .. الشمس .. والشيكولاتة .

الأربعاء، 26 مايو، 2010

نقص

لم أعد استطع أكل البطيخ بيدي كما اعتدت سالفاً .. لا أدري حقيقةً ما تلك الشوكة المعدنية التي أحملها بين أناملي المكتنزة .. برودتها لا تختفي حين أمسكها،أعلم أن السر في ذلك أن يداي لم تعدا دافئة كما اعتادتا .. قد تمر ثلاثة أيام دون أن أروي فيها الزهور .. أو دون أن أطعم ذلك الحيوان الرخو الذي أصبح لا يخرج من صدفته .. أجدني أشتري نبات الصبار بمختلف انواعه بدلاً من حوض من النعناع أو الريحان
وجدت أنني لم أعصر الليمون على طبق السلاطة الذي التهمنه دون أن أشعر أن هناك ما ينقصه .. و عندما تطول فترات أرقي في السرير ، أتذكر حينها أني قد تناولت قدحاً من القهوة خلال الساعات الماضية
أصبحت أشعر كثيراٌ أني أقوم بأشياء في حالات اللاوعي .. اللاشعور .. اللا.... لا أعرف حقاً ، و انما الذي أشعر به فقط و أتيقنه.. هو أن هناك شيئاً ينفصني .. ربما لا أعرفه .. انما هو بالفعل ينقصني و أحتاجه بشــــدة

إثبات حالة

رغم إننامبقناش بنتكلم غير قليل أوي .. أوي يمكن مبقناش نتكلم أصلاً .. بس انا فرحت أوي لما عرفت إني فيك سِبت أثر ..حاجة صغيرة أوي .. حاجة تثبت إننا في يوم كنا نعرف بعض .. لو كانت مجرد كلمة أو جملة أنا باستمرار كنت بقولها .. جملة بتاعتي أنـــا .. و اللي فرحني فعلاً ، معرفتي بإنك لسة بتقولها و بنفس الطريقة اللي كنت أنا بقولها بيها .. عِرفت إني لسة جوة ..جوة قلبك .. عقلك ..متفرقش .. المهم إني لسة ليا وجودفي وجدانك .. حتى لو إنت مش عارف دا أو قاصده ..بس أنـــا سايبة جواك حاجة

مش هرضي غرورك

أقول ؟! .. لا مش هقول .. طب هقول بأة .. ولا أقوللك لو كتبت عنك أي حاجة ، و لو حتى مش حلوة ، يبقى بديك قيمة اصلاً ، و احتمال مجرد تفكيري فيك - و إن كان سلبي- يرضي غرورك .. أقوللك .. أنا هسكت عشان حتى لو صادفت في يوم و عرفت إني بفكر فيك ، متعرفش إيه بيدور في دماغي عنك